:: ساحة الاقسام العامة ::

التسجيل : 04/10/2012

زيّ زي اي بني آدم عايش بالأردن , مرّيت بمرحلة مفصلية بالحياة ... التوجيهي

" يا أخي ليش خايفيين من التوجيهي كلّو تقرير مصير ؟ " .. بنطلك واحد مخلص توجيهي قبل 15 سنة بهالجملة .. وانت عاد بدك تتحمل القرف والفلسفة

" اسمع مالك الا الاستاذ معتز ابو حيط .. خرافي " .. " سبيك من حكي الناس .. ما الك الي دوسية - طرق النجاح بالنقل المباح - " ...

بداية السنة ,, رح تكون زي الي معبّي بنزين فلّ , ومتحمس يلفلف ويدور بالشوارع .. بتفتح اول كتاب واول كلمة بتخطر ع بالك " واااااال بدنا ندرس كل هاظ ؟ " ..
وانسى الوالد والوالدة " يابا ابصم انحت " .. كاسات العصير رح تضلها شغّالة عليك طول الوقت .. السندويشات ,, طبعاً the mini heart attack .. لمّا الوالدة تفوت عليك بكاسة هالعصير وتسلخ هالدعوة " الله يرظى عليك يمّا وينجحك " .. مع إنّو انت فعلياً الك 3 ساعات قاعد بتتقكر بملكوت الله .. ساعتها ضميرك بقرصك ..

طبعاً , لازم تسمع " اسمع لا تفظحنا محمد ابن ام عطا مش احسن منك ينجح "
انا مش فاهم التوجيهي تنافس ولا مكايدة ؟؟ ولا احلى اشي .. " اسمع يمّا بدي ياك تختم الكتب 3 مرات .. اقّل اشي " ! .. يابا ماريو .. ماريو .. ما ختمتها بدك يانا اختملك كتاب و3 مرات !! أرحموني ...

بتبلش الامدادات اللوجستية .. ورق اسئلة .. دوسيات .. دفاتر .. كتب - ولازم الكتب يكون مستعمل حتى تحس بقيمة المعلومة - .. المشكلة بدولك هالامدادات والمنهاج تغير ..

بتجي امتحانات التجريبي .. بتحاول تعصر حالك قد ما تقدر وتدرس .. طبعاً اذا بتغرطش ع اشي مش فاهمو ليوم الوزارة ...انسى وظعك !! .. لانو رح تلاحظ الانانية .. صحابك بالمدرسة .. بتسألهم سؤال ورح يردو عليك بالجملة الشهيرة
" والله ما درست ! " هون قدّامك خياريين .. يا أما بتسدقهم وبتعيش الدور معهم , يا اما بتشوفلك ناس غيرهم .. ما انو الاحتمال الاول الاقوى في اغلب الاحيان ..

طبعاً .. بتحي امتحانات الوزارة .. وبتبلش النصائح اللقمانية " يابا لا تّوتر " .. " عادي زي اي امتحان بس انو وزارة " ..

يوم النتائج .. الفصل الاول

- اذا ناجح : بجي ابوووووووووك بحضنك ببوسك بين عيونك " طول عمرك رافع راسي يا ابني " وامك بتزغرد .. والتلفونات شغّالة قايمة قاعدة .. وحوسة
بنزل اخوك صاروخ ع سيارة بوصي ع كنافة .. وتلفونات مع صاحبك
طبعاً بتشيك ع اصحابك .. وازنخ اشي يكونوا كلهم ناجحيين الا واحد ( وهذا ما حدث مع كاتب هذه التدوينة ) ..

- اذا راسب .. بجي ابوك بطلع عل ارض .. وبتلاقي الـ111 مطبوعة بين عيونه .. وبتبلش عاد " ما انت طول عمرك هامل وقليل حيا .. يعني كيف متوقع انك تنجح " .. " انت لا ابني ولا بعرفك , تفوووووووووووو " ..
رح يقاطعوك اهلك 3 سنين ,, ورح تتحول لطاولة او مزهرية .. وانسى !!

ببلش الفصل الثاني مع الجملة الاشهر " خلص هاد الفصل رح اشد حيلي " طبعاً اكبر كذبة بنكذبها ع حالنا بالتوجيهي ..
بتبلش تمسك بهالمواد .. طبعاً اذا كنت ناجح بالفصل الاول , بهنيك الامدادات اللوجستية رح تستمر ,, وتزداد قوتها .. من سندوش منزلي الصنع .. الي وجبات الشاورما .. وكمان حق - الفيتو حق اختيار الطبخة - .. وانسى العصائر والمرطبات .. والمروحة الك .. وشنتة جديدة .. ))

واذا كنت راسب .. فلا حول ولا قوة الا بالله , رح تنقطع عنك الامدادت اللوجستية ورح تتحاصر ورح يصير وضعك زي سوريا - الله يفرج على اهلها وينصرهم - .. انسى اشي اسمو سندويشات .. بدك تقوم لحالك تسوي " ما انت راسب ! " .. العصير .. ؟ اذا صحلك كاسة ميّ بدك تحمد ربك 1000 مرة ..

وبتجي امتحانات الوزارة .. الناجح والراسب بحاولو يدخلو بمعنويات عالية .. ودراما النصائح رح تستمر ..

بتخلص هالامتحانات .. وبتضلك ابو شهرين عبين ما تطلع النتائج ..

يوم النتائج ... !

- في حالة نجاحك رح يسوّلك حفلة منططلة .. رح تحس حالك عريس .. او المختار زي بماتركس .. الكل بستنى فيك .. يومتها رح تنزل بالسيارة وتزمر وتسوي قصص .. والكنافة والبيبسي .. و ام فلان الي اول مرة بتسمع فيها بتهنيك ..

وبحب اهنّي جميع الامهات ع تجهيزات المطبخ الي رح تجيهم .. من ورا التوجيهي
الهدية الاسمى والاحب .. على قلوب الجميع ( طقم فناجين ) .. واذا حبو يغيرو " بيجاما " بتستحي تلبسها قدام المراية حتى .. بس الاشي الاحلى والمحبب من قبل الكل .. " المصاري " بتنزل هالخمسات والعشرات عليك وانت مبسوط ...

- في حالة رسوبك ( وان شا الله ما حدا بعيش هاللحظة ) ... رح تنكحش من البيت في حال كونك شب ,, وحال كونك بنت ,, رح تصيرة " سيريلانكية " ..
واصحك !! تقول لابوك بدي اعيد التوجيهي .. " شو !! تعيد مين يا حبيبي !! بكرا بتنزل مع خالك عوظ بتوزع غاز " طبعاً انت بخف عقلك وبلتعن ابو سنسفيلك .. والاسوء لما تشوف كل صحابك نجحو الا انت ,, الجامعة ,, والمزز :P .. وانت لحالك مقطوع ..

طبعاً اهلك رح يضلهم يعايروا فيك طول عمرك للأسف !! مجتمعنا جاهل لدرجة .. والتوجيهي بدل ما يكون ممر للعبور .. صار " مقياس للذكاء " .. بس بحب احكيلك ابو الـ95 وابو الـ59 نفس المصير تقريباً .. وعجقة التخصصات كلنا عارفينها .. وعمرك ما تفكر اذا رسبت يعني انت غبي !! .. لا تفكر هيك ابداً ...

بالنهاية .. بحكي لكل واحد بدّو يصير توجيهي .. الله يوفقك .. سيبك من الناس واعتمد ع حالك .. قول لاهلك بديش نق ع راسي .. وادرس بضمير .. ولا تبلش حامي من اول السنة ,, عشان حماسك يضل معك طول الوقت .. .. الحماس زي نيتروس في need for speed .. بخلص بسرعة .. وبدو وقت ليتعبّى ! ..

سيبك من الدوسيات ... ادرس من الكتاب واختمه .. بعدين شوف دوسيات زي ما بدك ...

مجرد محاولة .. وان شا الله رح اصير انزل دايماً .. للي حاب يتابعني دخل هون

» عدد ساعات الصيام في العالم
» أربع كلمات بعد الفجر = عباده 3 ساعات
» قلة ساعات النوم تؤدى للسمنة وتؤثر على مستويات الطاقة بالجسم
» نتيجة الكلاسيكو ستحدد مصير مارتينو مع برشلونة
» اصابة طفل نتيجة انفجار جسم مشبوه جنوب نابلس

:: ساحة الاقسام العامة ::

ملتقى الاستراحة

ساعات تفصلنا عن نتيجة .. التوجيهي

ساعات تفصلنا عن نتيجة .. التوجيهي

مواضيع مماثلة

مواضيع مماثلة